Sa rampa de s’Asse Medianu in Casteddu. serrada eris pro mori de unu problema a unu ‘giuntu de dilatatzione’, at a èssere torrada a abèrrere martis 9 de su mese de santugaine 2018.
Dd’at naradu su sìndigu Massimo Zedda in nd’unu atobiu cun is giornalistas. Zedda at pretzisadu chi “a pustis de sas verìficas fatas dae sos tècnicos incarrigados, s’istabilidade istàtica de sa rampa no est in carchi modu cumprumittida”.
“Pro cantu pertocat imbetzes su càmbiu de su guard rail arrogadu pro mori de s’urtu de una vetura interessada in unu intzidente de reghente – at concruidu su primu tzitadinu – at a èssere mudadu cuddu puru in su cursu de sa chida benidora”. E cun sos 13milliones de èuros chi nche sunt in bilantzu pro mantenner is istradas, sa seguridade de sa tzirculatzione veiculare in s’Asse Medianu at a bènnere megiorada.
