Giòbia 15 de su mese de Santandria a Tàtari a sas oras 19, in sa sede de sa CSS in Cursu Vittorio Emanuele 32, incumintzat su laboratòriu linguìsticu “Tzarradas in sardu”.
Su laboratòriu est aprontadu pro cuntrastare su protzessu de “sradicamento della lingua sarda – si leghet in su comunicadu – nella nostra società”. Custa sa proposta chi arribbat de su sugetu-progetu Caminera Noa.
Su laboratòriu de arresonu, cun elementos de grammàtica normativa, at a tènnere sede a Tàtari e ant a pòdere partetzipare totus: non b’ant a èssere costos de iscritzione. Sos apuntamentos ant a èssere ònnia 15 dies.
Sos atòbios, tentos de Carlo Manca, istudiante de lìteras modernas, ativu in sa tradutzione de Facebook in sardu, ativista pro su bilinguismu cun s’assòtziu “Su Majolu”, s’ant a fàghere in sa forma de discussiones a tema.
Sas letziones sunt abertas a totus e no est rechertu a sos partetzipantes carchi esperièntzia, at a pòdere partetzipare duncas fintzas chi non tenet carchi elementu de connoschimentu de sa limba sarda.
A costadu de sos arresonos temàticos e de sa didàtica sunt prevìdidas fintzas dibatas cun autores de libros e cun protagonistas de su mundu de sa polìtica e de sa cultura isolana.
