Unu cavu de atzàrgiu longu diversos chilòmetros diat pòdere unire sas duas ispondas de su Lagu Omodeo tra Ardaule e Boroneddu, in s’Aristanesu, e cunsentire unu sorvolu cun sa tècnica de su bolu de ànghelu a turistas e apassionados amantes de s’adrenalina.
Su progetu est tra cussos finantziados dae sa Regione pro mèdiu de s’acòrdiu de programma chi s’assessore regionale a sa Programatzione, Raffaele Paci, at sutascritu cun sos sìndigos de sas Uniones de sas Comunas de su Guilcer e de su Barigadu. Prevìdidos investimentos pro 22 milliones de èuros in 18 comunas. Unu àteru progetu at a Interessare Samugheu e Asuni: previdet sa creatzione de diversas infrastruturas in su parcu Medusa, cun su megioru de sos percursos pro su trekking e su fàbricu de unu ponte tibetanu subra su riu Araxisi.
