Est Luca Caschili, 46 annos, su candidadu de su Movimentu 5 isteddos a sas eletziones suppletiva de su 20 ghennàrgiu pro assignare su collègiu uninominale de Casteddu. Ingegneri ambientale, assessore a s’Urbanìstica de su Comunu de Carbònia, at fatu s’intrada sua in sa cantzilleria de sa Corte de Apellu pagos minutos in antis de s’iscadèntzia de sos tèrmines, fissada pro sas 20 de oe. Depositados nùmene e sìmbulu. Cun issu, su candidadu guvernadore de su movimentu pro sas regionales de Freàrgiu, Francesco Desogus.
“Torro gràtzias a su Movimentu 5 Isteddos pro custa oportunidade e afrontu sa sumpetitzione eletorale cun ispìritu de servìtziu, ponende a disponimentu sa cumpetèntzia e s’amore chi tèngio pro sa tzitade mea e sa Sardigna – narat Luca Caschili – Sas potentzialidades de s’àrea casteddaja sunt enormes e non bido s’ora de portare a sa Camera sas rechestas de unu territòriu chi podet èssere, cun sas suas risorsas ambientales ma fintzas ligadas a su patrimoniu culturale, a s’innovatzione e a sa richesa de sos assòtzios impinnados in su sotziale, su beru motore de totu s’ìsula”.
Documento utilizzato ai fini del contributo ricevuto ai sensi
dell’art.8 comma 12 lett.b) della Legge Regionale 13 aprile 2017, n.5 annualità 2018
