“Lissentziados, umiliados, costrintos a rinuntziare a ogni deretu pro un’assegnu de fàmene. Sa sorte de sos traballadores de s’ex Saremar, sotziedade de navigatzione fata fallire dae Deiana e cumpàngios, est iscrita in s’ùrtimu provedimentu farsa cunsinnadu oe. In resumu sa Regione iscriet a sos traballadores: depeis rinuntziare a totus sos deretos pregressos, a su traballu e in càmbiu podeis retzire un’assegnu de fàmene”.
Ddu denuntziat su leader de Unidos Mauro Pili puntende su didu contra su bandu regionale pro sos ex Saremar. “Una proposta de contziliatzione chi est comente unu ricatu chi at a costrìnghere torra sos traballadores a unu sèberu a beru tostu – atacat Pili – tzèdere dignidade e diritos in càmbiu de un’assegnu de mantenimentu de 700 èuros netos belle. S’iscadèntzia fissada de su 31 santugaine pro presentare sas dimandas est s’ennèsima regalia a sas cumpangias de navigatzione”.
