“Sunt belle tremila sas firmas collidas in mancu de una chida dae su Comitadu ‘No Asl’ Ùnica contra s’Ats e sa reforma de sa sanidade sarda bòlida dae su tzentrumanca”.
Dd’annùntziant Paolo Truzzu, cussigere regionale de Fratelli d’Italia e presidente de su Comitadu, e su moderadore de sa campagna firmas, Piergiorgio Bolasco, giai primàriu de nefrologia in Casteddu. “Tremila firmas, tra banchettos e petitzione online, chi nche faghent cumprèndere de èssere in su caminu giustu e cantu siat forte su malumore chi sa reforma de Pigliaru e Arru at fatu nàschere tra sos tzitadinos e sos operadores de su setore. Ma custu est isceti su cumintzu”, afirmat Truzzu.
“Oras cumentzat una fase galu prus intzisiva de sa campagna nostra de regorta firmas”, agiunghet Bolasco. “Amus a pedire adesiones a su Comitadu NO Asl Ùnica dae in antis sos ispidales sardos”.
S’apuntamentu est fissadu pro chenàbura imbeniente dae sas 10 a sas 12. Dae in antis sos binti ispidales de sa Sardigna ant a èssere allestidos sos banchettos pro sa regorta firmas pro pedire s’abolitzione de s’Ats.
